2 Thessalonians 3

súwaꞋnaa umai námúnaa seró siráan-kwasai.

1kentáásí kwaásiyono. moórá-aimba simátimenaumpo ísáaro. kentáá súwaꞋnaa umai ÁánútumpaꞋa námúnaa seró. Ísóigon-aai simátíménana amápar-ayampaꞋa avekáámbá kóyáwé ínasa mináímbá tátoranaaontaveꞋa ÁánútumpaꞋa námúnaa seró. keinárawapimba Ísóigon-aaigo áꞋa mirá umái tátokaiye. 2moórá-yantaataveꞋa ÁánútumpaꞋa námúnaa seró. évakarawai Áánútun-aaiyavesa áraire sewasá évakarawai kamparé kwésesa miwívínkémbá sáwí-kwaasi sáwí-mayai kwémayaawai sínkamovainivo kentáá súwaꞋnaa umai ÁánútumpaꞋa námúnaa seró.

3Sáátáánigo tátoraivo séna Ísóigo kwemó sintembó mirámó iwáí póna kárákwimai asiramátinkaniye. 4keinárawataveta asiramái séta Ísóigoe tarúmai máyáamba póꞋa simátimunda-ainta taagwiyavéꞋa mirá úmaeꞋa iyónááowe kwésune.

5Ísóigo imáyáa timínaꞋa séꞋa Áánútu arumbá kwésimiye séꞋa ménaaontaveta námúnaaya kwésune. Ísu Káráísiti imáyáa timínaꞋa kwemó asiramáímo máyáísanamo ímo ávómo kaintembá kemá mirá ónááontaveta námúnaaya kwésune.

mayáímá máyáaro siráin-kwasai.

6kentáásí kwaásiyono. Ísoigo Ísu Káráísitina mayáíyá kwémayaundayaveta asiramái simátimeta séta keinárawapinkemba évakarawai Ísu Káráísitin-aaiyavesa áraire siráambanivo simátímakaunda-ainta íma kwarésa kavóná-kwaasiraamba umái máyáawata séta tiyuwéꞋa miwísé íma máéro kwésune. 7keinárawate maéwándaraꞋa kavóná-kwaasiraamba íma umái maéwánaꞋa suwánaraamba kesáámó uráundantemba mirán-oro. 8kentí toómbá íma úwoi kwéneta meéyán-umasuweta kwéneta noꞋwáámba aaváyaaraꞋa enónkaꞋa siyáántán-kwimai mayáíyá kwémaeta mimbáyáívínkén-tómbá mairáumne. keinárawaꞋa maseꞋá umátinkaunavo séta toómbá síméro íma súndaya mayáívínkén-óntándéí mairáumne. 9Áánútuna áséi-kwasai kosimátímakaunda-anonda tísaa umáímo toómbó mairékaiya kaweꞋá éta úsina íma tísaa úndaya mairáumne. mayáímó asiramáímo mayááwándaya suwánéꞋa keinárawakwaraꞋa mirá ónááontaveta kosimátímakaunda-anonda íya úwoi mairáumpo meéyámbakaumne. 10keinárawate maéwándarata maarán-áímbá simátimeta séta kavóná-kwaasi mayáímó ímo kwémayaan-kwaasi toómbá íma tíméroya simátímakaumne.

11keinárawapinkemba évakarawai kavóná-kwaasi mayáímá íma máyáamba kwantánaanta-aimba símae kwénaaonta ísaraumpo 12miwíyávéta asiramái símae iyéta séta Ísóigo Ísu Káráísitina mayáímá kwémayaundayaveta séta ivátuweꞋa kawer-umái méꞋa mayáímá kwémaeꞋa kentí mayáívínkémbá toómbá naaró kwésune.

13kentáásí kwaásiyono. kaweꞋ-máyáímá kwémayaamba íma tívón-káínaꞋa mirán-káwéꞋ-máyáímá máyáaro. 14maanáúváívímbá agaimakáunda-aimba évakarawai ísámai tínaaemba umásuwaiyawai tuwánéꞋa miwítí nénkakaamba umái méwasa imáyáa ésa tigaevimpín-umai koyauwéꞋmai teró. 15namuro-kwáásíyémo kwéontemba mirá íma éꞋa kentí kwaásiyemo kwéontemba mináímbá simái ságamatimero.

16Ísóigo paru kwéumatinkaiwaina ááimban-iye. kwemá kawe-kánáá sáwí-kanaa paru umátínkámaena iyíníntaveꞋa námúnaa kwésune. keinárawate Ísóigo ménintaveꞋa námúnaa kwésune. 17ayááíráꞋa kemá Póro agaimaráúmpo awánéꞋa kwenayáánaviꞋa póna kwenááiman-iye séꞋa ísáaro. amápar-auvaivimba miráumai kwéagayaumne.

Ísóigo Ísu Káráísiti úwoi kwétuwaꞋnaa-intaveꞋa námúnaa kwésune.

kemá Póro súnda-aimba kwéanasaiye.

18